سياسة الخصوصية

عن سعي وعن السياسة دي

سعي بيوصّل الكافيهات والمطاعم والمحلات في القاهرة بناس جاهزة تشتغل بالوردية. المنشأة بتنشر الوردية، والعامل بيقدّم عليها، وبعد القبول بيسجّل حضوره وانصرافه من التطبيق في مكان الشغل.

السياسة دي بتنطبق على تطبيق سعي وعلى الموقع ده، وبنحدّثها كل ما حاجة تتغيّر في طريقة شغل الخدمة.

البيانات اللي بنجمعها

كل اللي تحت يا إما إنت بتكتبه بنفسك، يا إما بيطلع من استخدامك للخدمة. ومابنشتريش بيانات من أي جهة.

• بيانات الحساب: الاسم، والنوع، والبريد الإلكتروني، ورقم الموبايل، وتاريخ الميلاد، ونوع الحساب (عامل أو منشأة).
• ملف العامل: نبذة قصيرة، والوظايف اللي بتشتغلها، والمحافظة والمدينة، والأجر اللي بتطلبه، وصورة شخصية لو ضفتها.
• ملف المنشأة: اسم النشاط ونوعه، وعنوان مكان الشغل، وموقعه على الخريطة.
• التحقق من الهوية: الرقم القومي، وصورتين لإثبات الشخصية من الوشّ والضهر.
• الورديات والطلبات: الورديات المنشورة، والطلبات عليها، والرسالة اللي مع الطلب، وحالة كل طلب.
• الحضور والانصراف: وقت تسجيل الحضور والانصراف، وموقعك في اللحظة اللي بتسجّل فيها.
• الرسايل: المحادثة بين المنشأة والعامل بعد القبول، وأي بلاغ عن رسالة.
• التقييمات: التقييم المتبادل بين العامل والمنشأة بعد ما الوردية تخلص.
• بيانات تقنية: عنوان IP، ورمز جهازك عشان توصلك الإشعارات، وسجل بالعمليات المهمة على حسابك.

الموقع الجغرافي

بنستخدم موقعك لحاجة واحدة: نتأكد إنك في مكان الشغل وإنت بتسجّل حضورك أو انصرافك.

التطبيق بيقرا موقعك بس في اللحظة اللي بتدوس فيها على زر الحضور أو الانصراف. مفيش تتبّع مستمر، ولا قراءة للموقع في الخلفية أو والتطبيق مقفول. والإذن اللي بنطلبه هو «أثناء استخدام التطبيق» بس، وبنطلبه أول مرة تدوس على الزر.

الموقع اللي بيتسجّل وقت الحضور والانصراف بيتحفظ عندنا، حتى لو التسجيل اترفض، ومعاه بيانات من جهازك بتساعدنا نتأكد إن التسجيل سليم.

المنشأة ما بتشوفش موقعك؛ اللي بيبان لها إن الوردية بدأت. وموقع مكان الشغل صاحب المنشأة بيسجّله بنفسه من جوه المكان. والعامل اللي بيتقبل بيشوف اسم المكان وعنوانه ورابط يفتحه بيه على الخرائط.

بنستخدم البيانات دي في إيه

• نفتح حسابك ونأمّنه.
• نوريك الورديات اللي تناسب شغلك ومدينتك، ونخليك تقدّم عليها.
• نخلي المنشأة تنشر الوردية وتستقبل الطلبات وتختار منها.
• نتأكد من الهوية قبل نشر وردية أو التقديم عليها.
• نتأكد من الحضور والانصراف من مكان الشغل.
• نبعتلك إشعارات ورسايل بريد عن حسابك وورديّاتك، زي تأكيد البريد وتغيير كلمة السر.
• نحمي الخدمة من إساءة الاستخدام.

مابنبيعش بياناتك، ومابنستخدمهاش في إعلانات، ومابنشاركهاش مع جهات إعلانية.

مين بيشوف إيه

• رقم موبايلك مش بيتشارك بين العامل والمنشأة خالص.
• المنشأة بتشوف عن المتقدّم: اسمه، وصورته لو موجودة، وتقييمه، وعدد وردياته، ولو غاب قبل كده، ومحافظته ومدينته، والرسالة اللي بعتها مع طلبه.
• العامل بيشوف عن المنشأة: اسم النشاط، وعنوان مكان الشغل، ورابط الخرائط، وتفاصيل الوردية من وقت وأجر.
• مستندات الهوية مابتوصلش للطرف التاني أبدًا.
• الصورة الشخصية ممكن يفتحها أي حد معاه الرابط بتاعها، لكن مستندات الهوية محفوظة في مكان مقفول.

بنحمي البيانات إزاي

• كل اتصال بالخدمة مشفّر.
• كل حساب يقدر يشوف بس اللي مسموح له بيه.
• مستندات الهوية محفوظة في مكان خاص، ومايشوفهاش غير اللي بيراجعها من فريق سعي.
• كلمة السر بتتحفظ بطريقة مينفعش حد يرجّعها، ولا إحنا.

بنحتفظ بالبيانات لحد إمتى

بنحتفظ ببياناتك طول ما حسابك موجود. ولما تطلب تمسح حسابك، بيحصل اللي مكتوب في الجزء الجاي.

حقوقك وطلباتك

تقدر تطلب تشوف بياناتك، أو تصحّحها، أو تاخد نسخة منها، أو تمسح حسابك، أو تسأل عن مستندات هويتك. ابعت طلبك على info@saiiy.com.

لما تطلب تمسح حسابك: بنقفل الدخول عليه، وبنشيل بيانات التعريف والملف الشخصي ونحط مكانها بيانات ماتدلّش عليك، وبنمسح صورتك الشخصية. وبيفضل محفوظ اللي لازم لسلامة الخدمة: الورديات والطلبات والحضور والتقييمات والرسايل والبلاغات ومستندات التحقق.

النسخة اللي بنبعتهالك من بياناتك فيها أوقات حضورك وانصرافك، ومافيهاش صور مستندات الهوية ولا الرقم القومي ولا مواقعك بالظبط.

لو فيه سبب قانوني أو أمني يمنع خطوة من طلبك، بنسجّل الطلب ومعاه السبب.

مسح التطبيق من موبايلك مابيمسحش البيانات اللي على الموبايل نفسه. عشان تنضّفها، اعمل تسجيل خروج وبعدين امسح بيانات التطبيق من إعدادات موبايلك.

الموقع ده

الموقع ده للتعريف بسعي. مافيهوش نماذج، وسعي نفسه مابيحطّش ملفات تعريف ارتباط (كوكيز)، لكن الشبكة اللي بتوصّل الموقع وبتحميه ممكن تحط كوكي أمان بيفرّق بين الزوار والبرامج الآلية. بنستخدم إحصاءات مجمّعة لفهم زيارات الموقع وأدائه، زي الصفحات اللي اتفتحت ومصدر الزيارة والبلد ونوع الجهاز والمتصفح. إحصاءات الزيارات لا تستخدم كوكيز تحليلية أو تخزينًا محليًا أو بصمة المتصفح. وكأي اتصال بالإنترنت، قد تُنقل بيانات تقنية، منها عنوان IP، أثناء معالجة الطلبات. ولا نستخدم الإحصاءات دي لتحديد هوية الزوار بشكل فردي. أزرار التواصل بتفتح واتساب برسالة جاهزة لرقم فريق سعي، أو برنامج البريد على جهازك برسالة جاهزة. ومفيش حاجة بتوصلنا غير لما إنت تبعت الرسالة. ولو بعتها، بنستخدم رقمك أو بريدك ونص رسالتك عشان نرد عليك بس، ومحادثة واتساب بتخضع لسياسة واتساب.

تحديثات السياسة

ممكن نحدّث الصفحة دي لما حاجة تتغيّر في الخدمة. وتاريخ آخر تحديث مكتوب فوق.

التواصل

لأي سؤال عن الخصوصية، أو لأي طلب يخص بياناتك، ابعتلنا على: